無由亂記

時間：星期六晚
地點：尖沙咀港青
事件：參加豬頭一個親戚既結婚酒

原本想上去飲之前順便行下海運，幫豬利買返兩個睡袋迎接泥緊既冬天。
係朗廷落左車，都未行到過海運，開始覺得好肚餓，
豬頭提議去 Starbucks 對件 cake，
但我想食 D 熱辣辣既野 —- 魚蛋粉，
所以改行落去 HMV 後面想搵間茶記坐低。

行到落去，可能已經七點幾啦，
十間九間都好爆，推住架車仔，又好唔方便，
最後揀左過去九龍酒店對件三文治……（好過無）

睇住果 menu，公司三文治必選啦，肚餓嘛，
豬頭口癮起叫多一客炸魷魚，又好遮，香口！
豬利趁車停左落泥就全程訓，兩口子落得清閒食得安樂。

八點半左右，踩上港青……

上到去，明明係結婚酒，但唔知點解，
見班長輩個個坐哂係到似泥賀壽……
一問之下先知，哦，原來無得打麻雀，
唔怪得個個賀哂壽啦……

雖然去飲我都唔鍾意兼唔會打麻雀，
但麻雀話哂係喜慶事既最好點綴，
一班老人家，個個坐哂係到無所事事，
睇見都戥佢地悶，
蝦~~唔知佢地幾點泥呢~~又坐左幾耐~~

九點八，終於開席，繼一對新人入場，上菜喇！
例牌播首靚靚既豬腩肉襯返碟乳豬全體，
豬利聽到笑咪咪。

侍應續一「分配」好，起筷囉……
咦，咁淋既塊皮？
梗係擺耐左過左氣啦（心想）
豬頭對它的評語是：
「嗯，個乳豬炆得唔錯。」

再一道，百花釀蟹鉗，
OK 啦，雖然油比較多，
但總算幾彈牙。

再一道，個名唔知喇，總之就係甜豆炒帶子，
一個字「差」！
帶子靚唔靚唔講喇，甜豆係拖左水先再炒，
夾上筷，望左好耐先知原來唔係毛豆係甜豆，
可想而然之，個 有幾肉！

再泥一道，XO醬西蘭花炒雙蚌 —- 貴花蚌 + 珍珠蚌，
可惜未有分配到貴花蚌，咬左口珍珠蚌，
哇~~陣雪味都未散，攪錯！

跟住到個翅，確係清！
清既意思係，裡面乜都無，
無蟹肉無竹笙無翅，甚至連肉絲都無，
有既只係成口「獻」。
同檯有人碗翅裡面有一舊透明既「獻」係到，
豬頭既評語係：
「師父，你連個獻都未開得混，
唔怪得之唔敢比料你加落去煮啦。」

第六度，碧綠鮑片，
總算有道似樣囉……

跟住上魚，
老老實實，咁大個人記憶所及，
真係未見過，打開個蓋見到係「雙龍出海」時，
確係呆一呆~~~
玩咩呀？？

到再上個雞、麵、飯，
真係唔好意思，已經無評語。
點解？無食喇，仲玩咩……
好彩對左件公治頂得下。

散席之後，兩口子就梗係忍唔住彈完再彈啦，
我話一圍都唔知駛唔駛三支野，
豬頭中肯 D ，話家陣市度好，點都要四支既……
四支！四支野係出面擺普通酒家，
點都唔會差成咁下化！
要知道，佢既差，
唔係淨係個 menu 差，
連料同煮都煮得差喎！！
係人係鬼做得食肆既，
炒碟甜豆都無奶油炒到皺哂皮成碟毛豆咁上檯啦下話。

返到屋企，意未平，
為證實究竟係間野獅子大口所以差成咁呢，
定係有人但求「一索」而攪到咁差，
屎忽鬼走上去生活易眇眇……
HK$4088.00 唔係全包既【精選 A】應該都幾見得人丫，
至少都有條肆肆正正既魚丫，
咁呢圍即係……有數得計！

原本o趙完唱好無品，
但呢次實在忍唔住……
言則上我絕對唔係果種做幾舊水人情然後不懷好意睇你比咩我食既人，
你請得既都叫至愛親朋，我泥得既亦確係戥你高興先至會泥，
（我平時三不到：唔熟唔到；唔鍾意唔到；唔比面唔到）
無人叫你去賒去借充大頭鬼擺過皮野一圍以慰天下，
有錢有有錢結，無錢有無錢結，
想籍擺酒賺錢其實唔緊要，結婚話哂都要駛好多錢，
大家都係打工仔，好理解，
可以幫補一下，元氣都易復完好多……
但係，都唔係無誠意到咁架下化……

再講，搵個無麻雀打既場，
究竟居心何在？
叫你老豆老母叫人早 D 泥時講乜好呢？
「呀三姑六婆，果晚早 D 到喇，不過無麻雀打架，
泥坐下先啦。」

咪再同我講信左基督教所以唔主張打牌，
唔主張囉，咪搵個無得打牌既場免卻一齊麻煩囉！
我都係向基督教家庭長大，
教會從來無教過我地信左主就唔駛理屋企人感受，
中國人既地方，一直就存在住好多中國人既習例，
咁你新年有無逗利是？
端午有無食粽？中秋又有無食月餅？
做冬有無返屋企食飯？？
如果以上樣樣你都話無，
OK，咁你身體力行到，
但又唔係喎，咁即係點？？
鍾意既就「入鄉隨俗」唔鍾意既就推耶穌出泥擋呀？
咁借問聲，
擺酒賺到既錢，你有無拾一奉獻呀？？？

This entry was posted on Monday, September 25th, 2006 at 2:11 pm under 碎碎唸.
You can follow any responses to this entry through the RSS 2.0 feed.
Sorry ! Both comments and pings are currently closed.