‧悼無名
3,354 Views | posted in 碎碎唸 |細果既時候，住唐樓，我住三樓，大姨姨丈住四樓，
姨丈養左隻家貓，無名，啡黑斑，好瘦，隨意上落，自出自入，強項捉老鼠…
媽咪係診所做姑娘，別名「衛生專家」飲一次水洗一次杯…好煩！
我，好蠢！亞媽話芝麻泥自士多啤利，我信！所以唔食！嘿！
無名貓比我大，自少，媽咪就教我：~~
貓好污糟，因為佢會食老鼠，週街去，好多細菌……
仲會抓人，比佢抓到塊面，以後就係「夜半歌聲」
（註：夜半歌聲好多年架喇，絕對唔係張哥哥果套）
我信架！因為我見過無名貓捉老鼠，
捉住咬兩口，放手…老鼠走，再捉過，捉完又放放完又捉…
直到老鼠唔識走……佢先掉頭走……
仲見過佢久不久就嘔，嘔親果 D 野都好核突！
因此，我從來唔摸佢，唔叫佢，唔理佢……
怕佢唔知幾時會抓到我塊面…
我見到佢似見到鬼，佢見到我……
次次佢都時運高，睇我唔到…：P
人漸漸大，開始對無名貓產生少少好奇…
會久不久「裝」下佢食乜…
原來佢餐餐都食五條魚，好鬼悶……
有次見到佢食草，好好奇，走去問姨丈…
姨丈話，貓唔舒服就會食草…
下？咩草都得既咩？
唔係，佢地出去識自己執架，好似執藥咁執。
下？咁犀利？？唔駛讀過書？？
人再漸漸大，心魔雖然仍然有，不過總算可以同佢一齊行同一條樓梯，
可以同佢一齊坐係樓梯，我望住佢，佢望住我…
純眼神交流，無身體接觸。
無名貓開始會叫下我…
把聲好怪，同佢瘦蜢蜢既外形好唔襯，原來佢把聲好嗲…
某日，姨丈無啦啦係天台養雞，D 雞隨行隨屙好鬼污糟！ >.<
仲成陣味，好難聞！
咦？咁貓呢？佢係邊樹大小便？
姨丈話，佢係天井自己攪掂，屙落果到既坑渠，佢得閒就去沖水，好方便！
我扭姨丈帶我去睇（要知道，衛生專媽係從來唔比我去天井架下！）
哦…原來咁得意，貓比雞好丫，貓會識得自己去厠所 ^^
轉眼九歲………
連續幾日無係樓梯撞到無名貓，有 D 怪…
問姨丈，姨丈話，佢老喇，過左身喇……
佢用個鞋盒裝好，帶左佢去長埋黃土…
勢估唔到，剛剛學識「水調歌頭」遮，就有機會去體會乜野叫悲歡離合！
更加估唔到，原來我會為左一隻連名都無既貓喊左一晚…
而且仲會係腦海裡面不停咁播放佢既生前點滴…
佢食魚、食草、洗面、嘔毛、捉雞捉老鼠、鬼鬼鼠鼠裝我媽咪、大搖大擺跳上跳落………
喊完一晚，以為好好多，點知…
放學番到泥一路行樓梯一路又想起佢…
因為發現，同一屋簷下九年喇，原來自己連摸都無摸過佢一下…
叫都無叫過佢一聲…
突然彈左媽咪成日話我唔生性，教我果句：
「樹欲靜而風不息，子欲養而親不在」
媽，我明喇，而家我好想叫下無名貓，摸下佢，抱下佢……
無名貓走左之後，先知道佢原佢陪我行過不知幾多遍樓梯，
每日佢都會係二樓梯間等我放學，然後一見到我行到上二樓，
就即刻跑上三樓，同我遙遙對望…
叫我一聲，先至跑番上四樓…
點解呢？點解呢 D 要係佢走左我先察覺？
點解當時我唔叫番佢呢？咁鍾意幫玩具改名，點解唔幫佢改番個？
點解唔可以係佢面前表現得親近 D 呢？
點解佢想擦我我要避？
點解要無左先知原來佢係自己成長既一部份？？
———————————————————————-
自此，但凡係邊見到貓都會對住貓扮貓叫，
喵喵喵喵喵…
希望可以再聽到無名貓既叫聲……雖然已經好糢糊……
自此，但凡見到貓都會痞底表現友好，那怕只係比貓貓擦一擦，
喵喵喵喵喵…
希望可以籍此讓自己記得，我係點樣做就左人生第一個遺憾！
———————————————————————-
2001 年 10 月 13 日，豬頭終於答允比我養佢平生至憎既貓，
係接貓番屋企既途中，就已經替佢改左個名…
「可樂」 可愛 + 快樂！可樂，呵~~夫復何求！
再養貓，並唔係想去彌補任何既事與物，
點補遮？要補既跟本已經唔係到！
再養貓，更加唔係想抹走任何既遺憾，
遺憾？無遺憾又點叫完整既人生！
再養貓，係因為雖然與無名未有過親密既接觸，
但係成長既任何階段裡面，
佢都未曾真正離開過…
對貓，佢早已經於某處埋下難解既情意結！
Tags :cats
