27th
May
2005
‧好耐無鬧人
2,690 Views | posted in 碎碎唸 |今日放工行到去巴士站，剛剛一架 9XX 正準備閂門，
拿拿臨追上去啦~~~
蝦，點知當我追到去巴士門口既同時，「馳匙~~~~~~~」
度門就閂左……
好彩，巴士前面有車頂住佢開唔到，咁有機會，老虎搭隻蟹都喪拍門，
希望司機大佬開返度門比我上車唔駛等下班車 ^^
「拍、拍、拍、拍、拍、拍」
拍左幾下，司機都無反應喎，人就開始燥，再泥：
「拍、拍、拍、拍、拍、拍、拍、拍、拍、拍、拍、拍」
呢次比上次更大聲，嘿！司機依然無反應~~
終於，係巴士上面既其他乘客忍唔住上前話比司機大佬聽外面有人係到拍門。
（真係好感激呢位乘客！！）
終於，司機依然望都無望過門口或者側鏡，然後「馳匙~~~~~~」度門再度打開。
噪底既我一上到車就問：「你頭先仲咩閂門？！」
司機望都無望過我：「上哂客咪閂門囉。」
我：「咁我係咩？唔係客咩？」
司機依然望都無望過我：「你剛剛追上泥之嘛。」
我：「你又未開得車，仲咩見我跑緊上泥唔等我就閂門丫？」
司機繼續望都唔望我：「哼，我睇你唔到喎！」
我：「咁我拍門你又唔開門？」
司機堅決仍然望都唔望我：「喂，聽唔到點開呀？」
我一輪咀：「下！你做司機既，有人係車身邊跑上泥追車又睇唔到，有人係咁喪拍度門你又聽唔到，
要等到其他乘客提你你先知，你係盲既定係聾架？要唔要叫公司幫您檢查一下你呢兩方面有無問題？
如果無既，係咪代表你係警覺性上有問題？？」
好野！司機大佬終於將佢個頭作另左過泥，望住我喇講：「咁你想點丫？」
我：「無，想你唔好再駁咀遮。」
前面頂住既車陸續開走，巴士亦徐徐開出，
而我呢隻潑婦，則沾沾自喜坐係司機位後少少果排側位，
全程落足眼力望住呢位勇敢而堅毅既司機大佬。
可能佢而家係到咒詛緊我，因為剛剛打左幾個「乞嗤」~~
Tags :
